సుజనా శతకము - కందపద్యములు:
1. పలికెడి వాచకములకును / చలిపెడి పనులకు పొరపులు సంభవమగుచో
పలుకులవి పలుకు వానిని / ఇలను వసించెడి జనమ్ము లెంచరు సుజనా!
2. తెల్లబడెడి కురులెప్పుడు / వెల్లడి జేయును నిరతము పెరిగెడి వయసున్
ఉల్లమున బెర్గు దెలివిడి / తెల్లనగు నెఱకల వలన తెలియదు సుజనా!
3. ఎప్పుడు శంకలు గలిగిన / నప్పుడె పరిజనము తోడ ననువున దానిన్
చప్పున సమీక్ష జేసిన / తప్పక సందిగ్ధమంత తఱుగును సుజనా!
4. జోకను గూడిన గుణములు / తేకువ నొందుచు పొదలెడి తీరున నిలుపన్
వీకను నెక్కొన జేయుచు / తాకించును మిసిమి నెపుడు ధరణిని సుజనా!
5. మాటల నుంచిన కోపము / చాటున నుంచుము చలిపెడి చర్యల లోనన్
మాటల చేతల నుంచుము / నీటుగ ననురతి వలపులు నిరతము సుజనా!
రచన: క్రొవ్విడి వేంకట రాజారావు
కామెంట్‌లు లేవు:
కామెంట్‌ను పోస్ట్ చేయండి