మనసులో అనుకున్న అంకెను చెప్పడం:

మీరు పైకి చెప్పకుండా మనసులో ఒక అంకెను అనుకోండి. దానిని 2 తో హెచ్చవేయండి. వచ్చినదానికి 2 కలపండి. ఆ మొత్తాన్ని 5 తో హెచ్చవేయండి. వచ్చిన విలువకు మరల 5 కలపండి. ఆ మొత్తాన్ని 10 తో హెచ్చించండి. తరువాత 10 కలిపి వచ్చిన అంకెను నాకు చెబితే మీరు మనసులో అనుకున్న అంకెను నేను చెప్పగలను. ఎట్లా అంటారా?

ఉదాహరణ చూడండి: నేను మనసులో 2 అనుకున్నాను. దానిని 2 తో హెచ్చించండి. 4 వచ్చింది. దానికి 2 కలపండి. 6 అయింది. దానిని 5 తో హెచ్చవేయండి. 30 వచ్చింది. దానికి 5 కలపండి. 35 అయింది. దానిని 10 తో హెచ్చించండి. 350వచ్చింది. (వచ్చిన మొత్తానికి పక్కన 0 పెడితే 10 తో గుణించిన ఫలితం వస్తుంది కదా!) దానికి 10 కలిపితే 360.

( 2 X 2 = 4 + 2 = 6 X 5 = 30 + 5 = 35 X 10 = 350 + 10 = 360 ) ఇది లెక్క. మీరు కళ్ళుమూసుకుని ఒక్క క్షణం ఆలోచించినట్లు నటించి వెంటనే 2 అని చెప్పండి.

ఇందులో ఉన్న రహస్యం:

1. ఎవరు ఏ అంకెను కోరుకున్నా, పైవిధంగా లెక్కించినప్పుడు చివరి రెండు అంకెలు తప్పనిసరిగా 60 తో అంతమవుతాయి. వారు చెప్పిన దాంట్లో చివరకు 60 రాకపోతే వాళ్ళు లెక్కించడంలో తప్పుచేసినట్లే!
2. మీరు చేయవలసింది - ఆ చివరి 60 ని వదిలి మిగిలి యున్న అంకెలో నుండి 1 తీసివేస్తే ఎదుటి వారు అనుకున్న అంకె వస్తుంది.
3. పై ఉదాహరణలో - చివరకు వచ్చినది 360. ఇందులో చివరి 60 ను వదిలివేసి మిగిలిన 3 నుండి 1 తీసివేయగా మనసులో అనుకున్న 2 వస్తుంది. ( 3(60) = 3-1=2 )
4. అలాగే 460 కు 3; 560 కు 4; 1060 కు 9; 5660 కు 55; -అలా అన్నమాట.
5. ఈ విధంగా మీరు కూడా చేసి ఎదుటి వారిని ఆశ్చర్యపరచండి.