:: సూక్తిముక్తావళి ::

శ్లో. ఆరోప్యతే శిలా శైలే, యత్నేన మహతా యథా,

     నిపాత్యతే క్షణేనాధ:, తథాత్మా గుణదోషయో:.

భావము: పర్వతముమీది కొక గండశిలను యెక్కించుట కెంతయో ప్రయత్న మవసరము. దానినే అచ్చటినుంచి క్రిందికి త్రోసివేయుట ఎంతో సుకరము. అట్లే మానవునియందు గుణములను జొప్పించుట బహుళ కష్టతరమున్ను, చెడును అలవరచుట మిక్కిలి సుకరమున్ను అయి వుంటూంది.

పద్యము:

అరసాత ( భభ భభ భభ భర – 13 )

    రాయిని కొండకు జేర్చుట కెంతయు లాతగు యత్నము కావలె, నట్టిదే

    రాయిని శైలము నుండియు త్రోసి మరల్చుట తేలికయేనగు, నట్టులే

    శ్రేయము గూర్చు గుణమ్ముల నన్నియు జేర్చుట కష్టమునై, చెడు నెంచుచున్

    శ్రేయముగాని నికారము లెల్లను జేర్చుట మానవులందున తేలికౌ.