2వ తేదీన పుట్టినవారు: 

    ఏ నెలలోనైనా 2వ తేదీన పుట్టినవారు చాతుర్యము, సహకారము, రాజకీయతంత్రజ్ఞత, సహజసిద్ధమైన శాంతిస్థాపకత్వాలు కలిగి ఉంటారు. వ్యక్తిగతమైన హోదాలో కంటే సమూహంలో వీరెక్కువగా పనిచేయగలరు. వీరికి సంగీతము, జంత్ర తాళ గానములందు ప్రేమ, వీటిలో చెప్పుకొనదగినంత పాండిత్యము కూడా ఉంటుంది. కళాత్మకము, సౌందర్యాత్మకములగు వస్తువుల పట్ల వీరు స్వభావసిద్ధమైన గ్రహణశక్తి కలిగి ఉంటారు. ఉద్రేకస్వభావము గలవారు గాన పరిసరముల పరిస్థితుల ననుసరించి ఒడిదుడుకులకు లోనగుచుందురు. 

    వీరు సులభంగా యితరులతో స్నేహం చేసుకోగలరు. వీరిని అందరూ మెచ్చుకొనుచుందురు. అవకాశం ఉన్నంతవరకు అప్పుడప్పుడు కలుగుచుండెడి నిరాశ నిస్పృహలనుండి వీరు తమను తాము కాపాడుకునే ప్రయత్నం చేయాలి. వీరికి లోతుగా ప్రేమించే స్వభావం ఉన్నందువల్ల యితరుల ప్రేమను వాంఛించుచుందురు. అది వీరికి అవసరము కూడాను. వీరిని గురించి, వీరి శక్తి సామర్థ్యములను గురించి, వీరు తక్కువ వెలకట్టుకొనుటకు యిష్టపడుటే గాక, ఒక్కొక్కప్పుడు అతి సామాన్య వ్యక్తిగా ఉండిపోయే ప్రమాదం కూడా కలదు. వీరు యితరులకు భాగస్వాములుగా ఉండుటకు సర్వవిధములా ఉత్తములు. 

    రాజకీయవేత్త, రాజ్యాంగవేత్త, కలక్టరు, జమాఖర్చు లెక్కలు వ్రాయుట, స్టెనోగ్రాఫరు, లోకస్థితి గణనము చేయు పరిశోధకుడు, పోలీసు అధికారి మొదలైన వృత్తులలో విజయము గాంచగలరు. సంగీతము, నటన, శిల్పము, కవిత్వము మొదలగు లలిత కళలను వీరు అభ్యసించవచ్చును. 

                                                                      సేకరణ: క్రొవ్విడి వేంకట రాజారావు