:: గణపతికి గరిక పూజ ఎందుకు చేస్తారు? :: 

    మన సనాతన ధర్మంలో విఘ్నేశ్వరుడి పూజకు గరికకు ఉన్న ప్రాధాన్యత అంతా ఇంతా కాదు. వినాయక చవితి పూజలో 21 రకాల పత్రాలు (ఆకులు) సమర్పించినప్పటికీ, గరికకు ఒక ప్రత్యేక స్థానం ఉంది. దీని వెనుక పురాణాలలో ఒక అద్భుతమైన కథ ప్రచారంలో ఉంది.

    పూర్వం అనలాసురుడు అనే భయంకరమైన రాక్షసుడు ఉండేవాడు. 'అనలము' అంటే అగ్ని. ఆ పేరుకు తగ్గట్టే ఆ రాక్షసుడు తన కంటిచూపుతోనే నిప్పులు కురిపిస్తూ, లోకాలన్నింటినీ తగలబెడుతూ, మునులను, దేవతలను తీవ్రంగా వేధించేవాడు. ఆ రాక్షసుడి అరాచకాలను భరించలేక దేవతలంతా వెళ్లి విఘ్ననాయకుడిని శరణు వేడుకున్నారు. లోక కళ్యాణం కోసం వినాయకుడు ఆ అనలాసురుడితో యుద్ధం చేసి, చివరకు ఆ రాక్షసుడిని నిలువునా మ్రింగివేస్తాడు.

    రాక్షసుడైతే అంతమయ్యాడు కానీ, అగ్ని స్వరూపుడైన అనలాసురుడిని మ్రింగడం వల్ల వినాయకుడి కడుపులో విపరీతమైన మంట, వేడి ప్రారంభమవుతాయి. ఆ తాపానికి గణపతి విలవిలలాడిపోతాడు.

    స్వామివారి కడుపు మంటను చల్లార్చడానికి దేవతలు అనేక ప్రయత్నాలు చేశారు. దేవేంద్రుడు అమృతాన్ని తెచ్చి ఇచ్చాడు, కానీ లాభం లేకపోయింది.  పరమశివుడు గంగాజలంతో అభిషేకం చేశాడు, అయినా వేడి తగ్గలేదు. శీతలత్వాన్ని ఇచ్చే చంద్రుడిని తెచ్చి వినాయకుడి తలపై ఉంచారు, అయినా ఆ తాపం శాంతించలేదు.

    ఆ సమయంలో అక్కడికి వచ్చిన కశ్యపాది మహర్షులు ఒక ఉపాయాన్ని ఆలోచించారు. ప్రకృతిలోనే అత్యంత చలువ చేసే గుణం ఉన్న 21 గరిక పోచలను సేకరించి, వాటిని వినాయకుడి తలపై ఉంచారు. ఆశ్చర్యకరంగా, అంతటి గంగాజలానికి, చంద్రుడికి లొంగని ఆ కడుపు మంట, కేవలం ఆ 21 గరిక పోచల స్పర్శతో వెంటనే తగ్గిపోయింది. వినాయకుడి శరీరం చల్లబడి, స్వామి ప్రశాంతతను పొందాడు.

    తన తాపాన్ని చల్లార్చిన గరికపై సంతోషించిన గణేశుడు ఇలా వరం ఇస్తాడు: "గరిక చాలా చలువ చేసే గుణం కలది, పవిత్రమైనది. ఎవరైతే నాకు భక్తితో 21 గరిక పోచలతో 'దూర్వాయుగ్మ పూజ' (జంట గరికల పూజ) చేస్తారో, వారి జీవితంలో వచ్చే అన్ని విఘ్నాలను తొలగిస్తాను. వారికి ఆయురారోగ్యాలు, సుఖసంతోషాలు ప్రసాదిస్తాను." అని. 

    అందుకే నాటి నుండి నేటి వరకు వినాయక చవితి రోజున అలాగే ప్రతి మంగళవారం, సంకష్టహర చతుర్థి రోజుల్లో వినాయకుడికి గరికతో పూజ చేయడం ఆనవాయితీగా మారింది. గరిక అనేది కేవలం ఒక గడ్డి పరక కాదు, అది అహంకారాన్ని తగ్గించే వినయానికి, శీతలత్వానికి ప్రతీక. ఇంతటి మహత్యం ఉన్న గరికతో ఆ లంబోదరుడిని పూజించి, స్వామి కృపకు పాత్రులమవుదాం.  ఓం గం గం గణపతయే నమ: