:: గోశాలలో గుప్త నామకరణం: గర్గాచార్యుల దివ్య దర్శనం :: 

    శ్రీకృష్ణుడు నంద ప్రజలో పెరుగుతున్న సమయంలో, ఒకనాడు యదువంశ కులగురువు, మహాతపస్వి అయిన గర్గాచార్యులు నందుని ఇంటికి విచ్చేస్తారు. ఆయన జ్యోతిష్య శాస్త్రంలో అఖండ పండితుడు. నందమహారాజు పరమ సంతోషంతో ఎదురేగి, అర్ఘ్యపాద్యాదులతో సత్కరించి, "స్వామీ! మీ వంటి మహాత్ములు గృహస్థుల ఇళ్లకు రావడం మా పూర్వజన్మ సుకృతం. నా కుమారులకు జాతక సంస్కారాలు నిర్వహించి, శుభప్రదమైన నామకరణం చేయండి" అని వినమ్రంగా వేడుకుంటూ ఈ విధంగా అంటాడు:

జ్యోతిశ్శాస్త్రులకెల్ల మేటరివి తేజోమూర్తి వాశాంత వి

ఖ్యాత స్ఫూర్తివి బ్రహ్మబోధనుడ వాకర్ణింపు నాపల్కు ని

ర్నీతుండైన గురుండు మానవులకున్ విప్రోత్తముండండ్రు నీ

చాతౌర్యంబున నీకుమారులకు సంస్కారంబు గావింపవే!

 "జ్యోతిష్య శాస్త్రజ్ఞులందరిలోనూ శ్రేష్ఠుడవైనవాడా! తేజోమూర్తివి, దిక్కులన్నిటా వ్యాపించిన కీర్తి గలవాడా! బ్రహ్మజ్ఞానాన్ని ఉపదేశించగల ఓ ఉత్తమ బ్రాహ్మణా! నా విన్నపాన్ని ఆలకించు. లోకంలో మానవులకు శాస్త్రవిధిని అనుసరించే గురువే దిక్కు అని పెద్దలు చెప్తారు. కాబట్టి, నీ నేర్పుతో నా కుమారులకు జాతకకర్మ, నామకరణాది సంస్కారాలను దయతో నెరవేర్చు స్వామీ!" అని నందుడు ప్రార్థించాడు.

    నందుని కోరిక విన్న గర్గాచార్యులు ఒక చిక్కును వివరిస్తారు. "నందా! నేను యాదవుల పురోహితుడిని. కంసుడు దేవకీ వసుదేవుల ఎనిమిదవ సంతానం కోసం గాలిస్తున్నాడు. నేను ఇక్కడకు వచ్చి మీ పిల్లలకు నామకరణం చేశానని తెలిస్తే, వీరు వసుదేవుని సంతానమేమో అని కంసుడు అనుమానిస్తాడు. ఆ అనుమానం ఈ పసిపాపల ప్రాణాలకు ముప్పు తెచ్చే అవకాశం ఉంది" అని హెచ్చరిస్తారు. రాజకీయం మరియు భక్తి రెండింటినీ మేళవించి గర్గాచార్యులు మాట్లాడిన తీరు ఇక్కడ గమనార్హం.

    దానికి నందుడు స్పందిస్తూ, ఎవరికీ తెలియకుండా అత్యంత రహస్యంగా ఈ కార్యక్రమాన్ని నిర్వహిద్దామని సూచిస్తాడు. ఏ విధమైన బాజాభజంత్రీలు లేకుండా, పవిత్రమైన గోవుల సమక్షంలో, గోశాల మధ్యలో నామకరణోత్సవం నిరాడంబరంగా మొదలవుతుంది. లోక రక్షకుడైన పరమాత్మకు లోకమంతటా చాటి చెప్పి పండుగ చేయాలని ఉన్నా, రక్షణ దృష్ట్యా ఆ తండ్రి పడే తపన ఇక్కడ కనిపిస్తుంది.

    ముందుగా రోహిణీ నందనుడిని చూసి గర్గాచార్యులు ఇలా అంటారు: "నందా! ఈ బాలుడు తన గుణగణాలతో చుట్టుపక్కల వారందరినీ ఆనందింపజేస్తాడు, కాబట్టి ఇతడు 'రాముడు' అని పిలవబడతాడు. అత్యంత బలశాలి కాబట్టి 'బలు' డనీ, ఒక గర్భం నుండి లాగబడి మరొక గర్భంలో ప్రవేశపెట్టబడినవాడు కావటం చేత 'సంకర్షణుడు' అని పిలవబడతాడు" అని చెప్పి 'బలరాముడు' గా నామకరణం చేశాడు.

    తరువాత యశోదమ్మ ఒడిలో ఉన్న నీలమేఘ శ్యాముని చూసి గర్గాచార్యులు పరవశించిపోతారు. "ఈ బాలుడు గత యుగాలలో తెలుపు, ఎరుపు, పసుపు వర్ణాలను ధరించాడు. ఇప్పుడు ఈ ద్వాపరంలో నీల వర్ణంలో (నల్లగా) ఉన్నాడు కాబట్టి 'కృష్ణుడు' అని పిలవండి. వసుదేవుని కుమారుడు కాబట్టి 'వాసుదేవుడు' అని కూడా ఇతనిని పిలవవచ్చు. నందా! ఈ బాలుడికి అనేక గుణాలు, రూపాలు, కర్మలు ఉండటం చేత ఇంకా ఎన్నో పేర్లు వస్తాయి. ఈ బిడ్డవల్ల మీరు అన్ని దు:ఖాలనుండీ గట్టెక్కుతారు. అంతేకాదు, ఈ బాలుడి వల్ల దుష్ట శిక్షణం, శిష్ట రక్షణం కూడా జరుగుతుంది. ఈ కుమారుడు శ్రీమహావిష్ణువుతో సమానమైన వాడు. ఇతడు ఉన్నచోట ధర్మం, విజయం స్థిరంగా ఉంటాయి" అని ఆ పరమాత్మ తత్వాన్ని నందుడికి సూచనప్రాయంగా తెలియజేస్తారు.

    నామకరణం ముగిసిన తర్వాత గర్గాచార్యులు ఆశీర్వదించి వెళ్లిపోతారు. నందుడు, యశోదమ్మ తమ అదృష్టానికి మురిసిపోతారు. సాక్షాత్తు పరమాత్మే తమ ఇంట్లో బిడ్డగా పెరుగుతున్నాడన్న సత్యాన్ని గర్గాచార్యులు సూచనప్రాయంగా చెప్పడంతో నందుని హృదయం భక్తితో నిండిపోతుంది. గోకులంలో గోపికలందరికీ తమ ముద్దుల కన్నయ్యకు "కృష్ణ" అనే పేరు దొరికిందని తెలిసి సంబరాలు చేసుకుంటారు.

    బ్రహ్మాది దేవతలకు కూడా లభించని ఆ పరమాత్మ దర్శనం, నామకరణ భాగ్యం ఒక గోశాలలో అతి సామాన్యంగా జరగడం భగవంతుని 'సౌలభ్యాన్ని' (భక్తులకు సులభంగా దొరికే గుణం) చాటిచెబుతుంది.