:: శ్రీ భీమేశ్వర శతకపద్యం -1 :: 

    నమస్కారం. ఈరోజు మన ఉదయపు ఆధ్యాత్మిక ప్రయాణంలో భాగంగా, ఆ భీమేశ్వరుని కృపతో నేను స్వయంగా రచించిన " భీమేశ్వర శతకం " లోని ప్రధమ పద్యాన్ని, దాని భావాన్ని మీతో పంచుకుంటున్నాను. 

 

శ్రీలన్ గూర్చెడి శంకరా! శుభకరా! చిత్తమ్ములో నేను నీ 

మూలాధార సురూపమున్ దలచుచున్ మోక్షమ్ము నర్థించుచున్ 

వాలాయమ్ము భవత్ పదాబ్జములకే ఫాలమ్ము తాకించి బం 

ధాలన్ త్రెంచుమటంచు కేల్మొగిచి నిన్ బ్రార్థింతు భీమేశ్వరా! 

    - సంపదలను ప్రసాదించేవాడా, సర్వ శుభాలను కలిగించే ఓ శంకరా! నా మనస్సులో సమస్త సృష్టికి మూలమైన నీ మంగళకర రూపాన్ని ధ్యానిస్తూ, మోక్షాన్ని యాచిస్తూ, ఎల్లప్పుడూ నీ పాదపద్మాలకు నా నొసటిని తాకించి నమస్కరిస్తున్నాను. ఓ భీమేశ్వరా! నన్ను చుట్టుముట్టిన ప్రాపంచిక బంధాలను త్రెంచివేసి, నాకు ముక్తిని ప్రసాదించమని దోసిలి ఒగ్గి నిన్ను ప్రార్ధిస్తున్నాను. అని ఈ పద్యం యొక్క భావం. 

    నేను ఈ పద్యాన్ని వ్రాస్తున్నప్పుడు నా హృదయంలో కదిలిన కొన్ని ఆధ్యాత్మిక విశేషాంశాలను ఇప్పుడు మీతో పంచుకుంటాను. ఈ పద్యంలో నేను " ఫాలమ్ము తాకించి ", " కేల్మొగిచి " అనే పదాలను ఉపయోగించాను. మన శరీరంలో అహంకారానికి కేంద్రం మన తల. ఆ తలను దైవ చరణాలపై ఉంచడం అంటే, నాలోని అహంకారాన్ని పూర్తిగా తుడిచిపెట్టుకుని ఆ పరమశివునకు సంపూర్ణంగా శరణాగతి అవ్వడమే అని నా భావన. 

    అలాగే పద్యంలో " మూలాధార సురూపమున్ " అని పేర్కొన్నాను. యోగశాస్త్రం ప్రకారం మన శరీరంలో కుండలినీ శక్తి జాగృతమయ్యే మొదటి చక్రం మూలాధారం. అందుకే, ఈ చరాచర సృష్టి అంతటికీ మూలమైన ఆధార స్వరూపుడు ఆ భీమేశ్వరుడే అని నా మనసుకు స్ఫురించిన సత్యాన్ని ఇక్కడ పొందుపరచినాను. 

    సాధారణంగా మానవులం దేవుడిని లౌకికమైన కోరికలు, సంపదలు కోరుతూంటాం. కానీ, ఈ శతక ఆరంభంలోనే నేను ఆ భీమేశ్వరుడిని కేవలం " మోక్షాన్ని ", ఈ సంసార " బంధాల నుంచి విముక్తిని " మాత్రమే అర్థించాను. శతక ఆరంభంలోనే ఇంతటి వైరాగ్య భావనతో స్వామిని ప్రార్థించడం వెనుక నా అంతరంగంలోని భక్తి ప్రపత్తులే కారణం. శార్దూలవిక్రీడిత వృత్తంలో నడిచే ఈ పద్యం ఉదయకాలస్మరణకు యోగ్యమైనదని నా భావన. 

    విన్నారు కదా! బాగుంటే లైక్ చేసి, మరిన్ని పద్యాలకై ఛానల్ ను ఇప్పుడే సబ్ స్క్రైబ్ చేసుకోండి. సర్వేజనా సుఖినోభవంతు! స్వస్తి!!