:: నిమి చక్రవర్తి - దేహంలేని రాజు ::  

    మనం ప్రతిరోజూ వాడే " నిమిషం " అనే పదానికి అర్థం ఏమిటో తెలుసా? దీని వెనుక భాగవతంలో ఒక వింత కథ ఉంది. 

    ఇక్ష్వాకు వంశానికి చెందిన నిమి చక్రవర్తి ఒక యజ్ఞం చెయ్యాలనుకుంటాడు. కానీ కులగురువు వశిష్ఠుడు వేరే యజ్ఞంలో బిజీగా ఉండడంతో, నిమి మరో ఋషితో యజ్ఞం మొదలుపెడతాడు. దీనికి కోపించిన వశిష్ఠుడు " నీ దేహం పడిపోవుగాక " అని శపిస్తాడు. నిమి కూడా ప్రతిశాపం ఇస్తాడు. 

    యజ్ఞం పూర్తయ్యాక, దేవతలు ప్రత్యక్షమై నిమి చక్రవర్తిని బ్రతికించాలనుకుంటాడు. కానీ, నిమి  " దేవతలారా! ఈ శరీరం రోగాలకు, దు:ఖాలకు నిలయం. నాకు మరలా దేహబంధం వద్దు. నేను దేహం లేకుండానే ఉండాలను కుంటున్నాను " అని అంటాడు.

    దేవతలు ఆశ్చర్యపోయి, సరే అంటూ ఆయనను అందరి ప్రాణికోటి కళ్ళల్లో కనురెప్పగా ఉండమని   ఒక వింత వరాన్ని ఇచ్చి దీవించారు.

    మన కనురెప్పలు కొట్టుకోవడాన్ని సంస్కృతంలో " నిమేషము " అంటారు. నిమి చక్రవర్తి మన కనురెప్పలమీద ఉండటంవల్లే ఆ పేరు వచ్చిందని భాగవతం చెబుతున్నది. మనం కనురెప్ప వేసే కాలాన్ని ' నిమిషం ' అనడానికి మూలం ఆయనే. 

    మనం కనురెప్ప వేసే సమయాన్ని అందుకే ' నిమిషం ' అంటాం. అంటే, మన ప్రతి కనురెప్పపాటులోనూ ఆ నిమి చక్రవర్తి ఉన్నాడన్నమాట!  .