:: ఆయనకు 24 మంది గురువులు ::  

    సాధారణంగా మనకు ఒకరో ఇద్దరో గురువులు ఉంటారు. కానీ, భాగవతంలో ఒక మహానుభావుడు ఏకంగా 24 మందిని గురువులుగా చేసుకున్నాడు. ఆశ్చర్యంగా ఉందా? ఆ 24 మంది ఎవరో కాదు. మన చుట్టూ ఉండే ప్రకృతి! 

    యదుమహారాజు ఒకసారి అడవిలో పరమానందంతో తిరుగుతున్న ఒక అవధూతను చూస్తాడు. " స్వామీ! రాజ్యాలు లేవు. సంపద లేదు. అయినా మీరు ఇంత ఆనందంగా ఉండటానికి కారణం ఏమిటి? మీకు ఈ విద్య నేర్పిన గురువు ఎవరు? అని అడుగుతాడు. 

    అప్పుడు అవధూత నవ్వుతూ, " రాజా! నాకు ఒక్కరు కాదు, 24 మంది గురువులు ఉన్నారు " అని చెబుతూ ప్రకృతిలో తను నేర్చుకున్న పాఠాలను వివరిస్తాడు. భూమి- ఎంతమంది తొక్కినా, ఎన్ని కష్టాలు పెట్టినా ఓర్పుగా ఉండడం భూమి దగ్గర నేర్చుకున్నాను. గాలి - గాలి, సుగంధాన్ని, దుర్గంధాన్ని మోస్తుంది. కానీ, దేనికీ అంటుకోదు. అలా నిర్లిప్తంగా ఉండడం గాలి దగ్గర నేర్చుకున్నాను. ఆకాశం - ఆకాశం అంతటా ఉంటుంది. కానీ, దేనిలోనూ కలిసిపోదు. ఆత్మకూడా అంతేనని తెలుసుకున్నాను. సాలెపురుగు తనలోనుండే దారంతీసి గూడు అల్లి, మళ్ళీ తనలోనే ఉపసంహరించుకుంటుంది. భగవంతుడు కూడా ఈ సృష్టిని అలాగే చేస్తాడని అర్ధం చేసుకున్నాను. 

    ఇలా అగ్ని, నీరు, సూర్యుడు, చంద్రుడు - చివరకు ఒక పావురాన్ని చూసికూడా జీవిత సత్యాలను నేర్చుకున్నానని చెబుతాడు. 

    నేర్చుకోవాలనే తపన ఉంటే, మనచుట్టూ ఉన్న ప్రతి అణువు ఒక గురువే. జ్ఞానం పుస్తకాలలోనే కాదు  ప్రకృతిలోనూ ఉంది.