:: భీమేశ్వర శతక పద్యం - 21 :: 

శ్రోతలందరకూ క్రొవ్విడి వెంకట రాజారావు అనేక నస్కారములు. . భగవంతుడు మనకి చేతుల్ని ఇచ్చాడు, కళ్ళని ఇచ్చాడు, మాట్లాడే వాక్కుని ఇచ్చాడు. కానీ, ఈ ఇంద్రియాలన్నీ ఎప్పుడు పవిత్రమవుతాయి? కేవలం లౌకికమైన పనులు చేసుకుంటూ, ప్రాపంచిక సుఖాల్లో మునిగిపోతే మానవ జన్మకు సార్థకత ఉంటుందా? లేదు! మన అవయవాలు భగవత్ సేవలో తరించినప్పుడే ఈ జన్మ ధన్యమవుతుంది. నేను వ్రాసిన 'శ్రీ భీమేశ్వర శతకం' లోని ఒక  శార్దూలవిక్రీడిత పద్యాన్ని, దాని వెనుక ఉన్న నా కవి హృదయాన్ని ఈరోజు మీ ముందుకు తీసుకువస్తున్నాను.. వినండి. విని ఆశీర్వదించండి. 

ఖ్యాతింగూర్చు శివార్చనన్ సలుపగా కాంక్షించు హస్తంబులున్

ప్రీతింజూపెడి లింగమూర్తిని గనన్ విప్పారు నేత్రమ్ములున్ 

నీతింజెప్పి శశాంకమౌళి మహిమల్ నేర్పించు నాలాపముల్ 

పూతమ్మౌచును వాసిచెందునుగదా! భూతేశ భీమేశ్వరా!

 "ఓ భూతనాథా! దక్షారామ క్షేత్ర పాలకుడైన ఓ భీమేశ్వరా! ఈ లోకంలో మనుషులకు నిజమైన కీర్తిని, ఆత్మశాంతిని చేకూర్చే శివపూజ చేయడానికి నిరంతరం తపించే చేతులు... ఎంతో ప్రేమతో, కరుణతో భక్తుల వైపు చూసే ఆ పరమశివుని లింగమూర్తిని दर्शनం చేసుకోగానే ఆనందంతో, భక్తితో విప్పారే కళ్ళు... సమాజానికి ధర్మమార్గాన్ని బోధిస్తూ, ఆ చంద్రశేఖరుని లీలలను, మహిమలను తోటివారికి నేర్పించే పవిత్రమైన మాటలు... ఇవి మాత్రమే ఈ సృష్టిలో అత్యంత పవిత్రమైనవి, నిలకడైన కీర్తిని పొందేవి అని ఈ పద్యం యొక్క భావం."

 ఈ పద్యం వెనుక నా అంతరంగ ఆలోచన ఏమిటంటే... భక్తి అనేది కేవలం గుడికి వెళ్ళి దండం పెట్టుకోవడానికో, లేదా మన స్వార్థ పూరిత కోరికలు కోరుకోవడానికో పరిమితం కాకూడదు. అందుకే ఈ పద్యంలో నేను 'నీతింజెప్పి' అనే పదాన్ని చాలా ప్రాధాన్యతతో ప్రయోగించాను.

నిజమైన భక్తుడు కేవలం అర్చనలు చేయడమే కాదు... సమాజంలో ధర్మాన్ని, నీతిని ప్రబోధించాలి. ఇతరులకు మంచి మార్గాన్ని నేర్పించాలి. మన ఇంద్రియాలైన కళ్ళు, చేతులు, వాక్కు... వీటన్నింటినీ ఒక సన్మార్గంలో నడిపించినప్పుడే, భక్తితో పాటు సామాజిక బాధ్యత కూడా తోడైనప్పుడే ఆ భక్తి పరిపూర్ణమవుతుంది. లౌకిక జీవితాన్ని పరమార్ధంతో ముడిపెట్టడమే నా ఈ పద్యం యొక్క ముఖ్య ఉద్దేశం.

మన వాక్కు, మన చూపు, మన కర్మ అంతా ఆ భీమేశ్వరుని సేవలోనే తరింపజేద్దాం. ఆ పరమశివుని కృపాకటాక్షాలు మనందరిపై ఎల్లవేళలా ఉండాలని ఆకాంక్షిస్తూ... నా ఈ పద్యం, నా కవి హృదయం మీకు నచ్చినట్లయితే తప్పకుండా లైక్ చేయండి, షేర్ చేయండి. ఛానల్ ను సబ్ స్క్రైబ్ చేసుకొండి.  

చిన్న మనవి: బొమ్మలో ప్రింటైన పద్యం చివరి పాదంలో పూతమ్మాచును కు బదులు పూతమ్మౌచును  అని సరిచేసుకోగలరు. 

సర్వేజనా సుఖినోభవంతు! స్వస్తి!!