:: స్టోన్‌హెంజ్ - వేల ఏళ్ల నాటి రాతి మిస్టరీ :: 

     నమస్కారం! 'జీవన స్రవంతి'కి స్వాగతం. ప్రపంచంలో ఎన్నో వింతలు ఉన్నాయి, కానీ ఇంగ్లాండ్‌లోని సాలిస్‌బరీ మైదానంలో నిశ్శబ్దంగా నిలబడి ఉన్న ఆ భారీ శిలలు మాత్రం శాస్త్రవేత్తలకు వేల ఏళ్లుగా నిద్రలేకుండా చేస్తున్నాయి. అవే 'స్టోన్‌హెంజ్'. సుమారు ఐదు వేల ఏళ్ల క్రితం, చక్రం కూడా కనిపెట్టని కాలంలో... కొన్ని టన్నుల బరువున్న ఈ రాళ్లను అక్కడికి ఎలా తెచ్చారు? అసలు వీటిని ఎందుకు నిర్మించారు? ఇది ఒక సమాధా? ఖగోళ పరిశోధన శాలనా? లేక గ్రహాంతరవాసుల స్థావరమా? ఎనిమిది నిమిషాల ఈ ప్రత్యేక వీడియోలో, స్టోన్‌హెంజ్ వెనుక ఉన్న అంతుచిక్కని రహస్యాలను లోతుగా విశ్లేషిద్దాం.

     స్టోన్‌హెంజ్ నిర్మాణం సుమారు క్రీస్తుపూర్వం 3000 సంవత్సరాల క్రితం ప్రారంభమైందని చరిత్రకారులు చెబుతారు. అంటే ఈజిప్టు పిరమిడ్ల కంటే కూడా ఇవి పాతవి. ఇక్కడ ఉన్న ఒక్కో రాయి బరువు సుమారు 25 టన్నుల నుండి 50 టన్నుల వరకు ఉంటుంది. ఆశ్చర్యకరమైన విషయం ఏమిటంటే, ఈ రాళ్లు ఆ ప్రాంతంలో దొరికేవి కావు. వీటిని సుమారు 150 మైళ్ల దూరంలో ఉన్న వేల్స్ పర్వతాల నుండి ఇక్కడికి తరలించారు. అప్పట్లో ఇనుప పనిముట్లు లేవు, పెద్ద వాహనాలు లేవు. మరి అంత దూరం నుండి, అంతటి బరువున్న రాళ్లను అడవులు, నదులు దాటించి ఎలా తీసుకువచ్చారు? ఇది మానవ శక్తికి సాధ్యమేనా? లేక ఏదైనా అతీత శక్తి సాయం తీసుకున్నారా?

     స్టోన్‌హెంజ్ కేవలం రాళ్ల కుప్ప కాదు, ఇది ఒక అద్భుతమైన ఇంజనీరింగ్ డిజైన్. సంవత్సరంలో సుదీర్ఘమైన రోజు (Summer Solstice) నాడు, సూర్యుడు ఉదయించేటప్పుడు సూర్యకిరణాలు సరిగ్గా ఈ రాళ్ల మధ్య నుండి ప్రసరిస్తాయి. అంటే ఐదు వేల ఏళ్ల క్రితమే, ఇక్కడి ప్రజలకు ఖగోళ శాస్త్రంపై, గ్రహాల గమనంపై అపారమైన అవగాహన ఉందని అర్థమవుతోంది. ఇది ఒక సోలార్ క్యాలెండర్ లాగా పనిచేసేదని, గ్రహణాలను ముందే గుర్తించడానికి దీనిని ఉపయోగించేవారని శాస్త్రవేత్తల ప్రాథమిక అంచనా. కానీ అంత ఖచ్చితత్వాన్ని ఆ కాలంలో ఎలా సాధించారు అనేది ఇప్పటికీ ఒక మిస్టరీ.

     ఈ రాళ్ల గురించి జానపద కథలు కూడా ఎన్నో ఉన్నాయి. మధ్యయుగ కాలంలో, ప్రసిద్ధ మంత్రగాడు 'మెర్లిన్' తన మంత్రశక్తితో ఈ రాళ్లను ఆకాశం నుండి ఇక్కడకు తెచ్చి పెట్టాడని ప్రజలు నమ్మేవారు. మరికొందరు ఇవి గ్రహాంతరవాసులు భూమిపై దిగడానికి నిర్మించిన సంకేతాలని భావిస్తారు. ఇటీవలి కాలంలో జరిపిన తవ్వకాల్లో ఈ రాళ్ల చుట్టూ వందలాది మనుషుల అస్థిపంజరాలు బయటపడ్డాయి. దీనిని బట్టి ఇది ఒక స్మశాన వాటిక అని, ఇక్కడ మరణించిన వారి ఆత్మలకు శాంతి కలగడానికి పూజలు చేసేవారని పరిశోధకులు చెబుతున్నారు.

    స్టోన్‌హెంజ్ గురించి మరో వింతైన విషయం ఏమిటంటే, ఈ రాళ్ల అమరిక వల్ల అక్కడ ఒక ప్రత్యేకమైన 'ఎకో' (ప్రతిధ్వని) వస్తుంది. ఒక రకమైన శబ్ద తరంగాలను సృష్టించడానికి కూడా దీనిని నిర్మించి ఉండవచ్చని తాజా పరిశోధనలు చెబుతున్నాయి. పురాతన కాలంలో ఇక్కడ మతపరమైన సంగీత ఉత్సవాలు జరిగేవని, ఆ శబ్దం ప్రజలలో ఒక రకమైన పారవశ్యాన్ని కలిగించేదని కొందరు శాస్త్రవేత్తల వాదన. అంటే ఇదొక ఓపెన్ ఎయిర్ థియేటర్ అని కూడా మనం అనుకోవచ్చు.

     ఎన్ని వందల పరిశోధనలు చేసినా, స్టోన్‌హెంజ్ తన రహస్యాలను పూర్తిగా విప్పడం లేదు. కాల గమనంలో ఎన్నో నాగరికతలు అంతమైపోయినా, ఈ రాళ్లు మాత్రం చెక్కుచెదరకుండా నిలబడి నాటి మానవుడి మేధస్సుకు నిదర్శనంగా నిలిచాయి. ప్రకృతి వైపరీత్యాలను తట్టుకుని ఐదు వేల ఏళ్లుగా నిలబడటమే అతిపెద్ద వింత. ఈ అంతుచిక్కని రాతి నిర్మాణం గురించి మీరేమనుకుంటున్నారు? ఇది దేవుడి కోవెలనా లేక సైన్స్ ప్రయోగశాలనా? కామెంట్ చేయండి. మరిన్ని ప్రపంచ వింతల కోసం మన 'జీవన స్రవంతి'ని సబ్‌స్క్రైబ్ చేసుకోవడం మర్చిపోకండి.

    వచ్చే వీడియోలో మరో ఆసక్తికరమైన అంశంతో కలుద్దాం. అంతవరకు సెలవు. నమస్కారం.

 :: రుక్మిణీ కల్యాణం :: 

    నమస్కారం! భాగవతసుధకు స్వాగతం! మద్భాగవతంలో అత్యంత మధురమైన ఘట్టం... రుక్మిణీ కల్యాణం. విదర్భ రాజపుత్రి రుక్మిణీదేవి, సాక్షాత్తు లక్ష్మీ స్వరూపం. చిన్నతనం నుండే కృష్ణుడి గుణగణాలను, విక్రమాలను విని, ఆయన్నే తన ప్రాణనాథుడిగా మదిలో ప్రతిష్టించుకుంది. కానీ, ఆమె అన్న రుక్మి... స్వార్థంతో, అహంకారంతో చెల్లెలిని శిశుపాలుడికి ఇచ్చి పెళ్లి చేయాలని నిశ్చయించాడు.

     పెళ్లికి సమయం దగ్గర పడుతోంది. అటు శిశుపాలుడు పెళ్లి కొడుకుగా వస్తున్నాడు. దిక్కుతోచని స్థితిలో రుక్మిణి ఒక సాహసం చేసింది. వృద్ధ బ్రాహ్మణుడైన అగ్నిద్యోతనుని  పిలిచి ఆయనద్వారా , తన హృదయావిష్కరణ చేస్తూ ఏడు శ్లోకాలతో కూడిన ఒక లేఖను కృష్ణుడికి పంపింది.

"శ్రుత్వా గుణాన్ భువనసుందర..." "ఓ ప్రాణేశ్వరా! నా సిగ్గును వదిలి చెబుతున్నాను... నిన్ను తప్ప వేరొకరిని నేను వరించలేను. రేపు నేను పార్వతీ దేవి పూజ కోసం ఆలయానికి వస్తాను. రాక్షస వివాహ పద్ధతిలో నన్ను నీదానిగా చేసుకో. నువ్వు రాకపోతే ఈ ప్రాణాలు వదిలేస్తాను" - ఇది ఆ తల్లి వేడుకోలు.

     ఆర్తత్రాణ పరాయణుడు కదా ఆ నల్లనయ్య! సందేశం అందగానే రథం ఎక్కి కదిలాడు. అటు ఆలయంలో రుక్మిణి ఎదురుచూస్తోంది. మనసులో గౌరీ మాతను ప్రార్థిస్తోంది... "అమ్మా! ఆ కృష్ణుడే నాకు భర్త కావాలి". పూజ ముగించుకుని బయటకు రాగానే, వేలమంది రాజుల మధ్యలో, సింహంలా కృష్ణుడు ప్రత్యక్షమయ్యాడు. ఒక్క ఉదుటున రుక్మిణి చేయి పట్టుకుని తన రథంపై ఎక్కించుకున్నాడు.

     అడ్డువచ్చిన శత్రువులను తన పరాక్రమంతో చెల్లాచెదురు చేసి, రుక్మిణీదేవిని ద్వారకకు తీసుకెళ్లాడు. అక్కడ వేదమంత్రాల సాక్షిగా, లోక కళ్యాణార్థం రుక్మిణీ-కృష్ణుల వివాహం వైభవంగా జరిగింది.

    ఈ కథ నచ్చితే లైక్ చెయ్యండి. మరిన్ని భాగవత కథలకోసం ఛానల్ ను వెంటనే సబ్ స్క్రైబ్ చేసుకోండి. 

    ఈ కథ మనకు ఇచ్చే సందేశం ఒక్కటే... మనం నిష్కల్మషమైన భక్తితో ఆ పరమాత్మను పిలిస్తే, ఆయన ఏడు సముద్రాల అవతల ఉన్నా సరే, మన కోసం పరుగున వస్తాడు.

సర్వం శ్రీకృష్ణార్పణమస్తు.

అన్నట్టు రేపు సోమవారం శివలీలామృతంలో భాగంగా మన  ఛానల్ లో మృత్యుంజయ విజయం - భక్త మార్కండేయ చరిత్రను తెలుసుకుందాం. మీరంతా తప్పక వింటారని ఆశిస్తున్నాను. 

 

:: మృత్యుంజయ విజయం - మార్కండేయ చరిత్ర ::

    ఓం నమః శివాయ. అనంతమైన శివలీలలు అద్భుతమైనవి, అనిర్వచనీయమైనవి. భక్తుల పాలిట కల్పవృక్షం, అభయం ఇచ్చే శంకర భగవానుడి లీలలను స్మరించుకోవడం మన పూర్వజన్మ సుకృతం. ఈ సోమవారం శివలీలామృతంలో మనం చెప్పుకోబోయేది... మృత్యువునే గెలిచిన ఒక చిన్నారి భక్తుడి కథ. కాలాతీతుడైన ఆ పరమశివుడు, కాలానికి అధిపతి అయిన యమధర్మరాజునే ఎదిరించి తన భక్తుడిని ఎలా కాపాడుకున్నాడో ఈ వీడియోలో వివరంగా తెలుసుకుందాం. ఇది కేవలం ఒక పురాణ గాథ మాత్రమే కాదు, భక్తికి, పట్టుదలకు, శరణాగతికి పరాకాష్ట.

    పూర్వం మృకండు మహర్షి, ఆయన భార్య మరుద్వతి సంతానం కోసం పరమశివుని ధ్యానించారు. వారి భక్తికి మెచ్చిన శివుడు ప్రత్యక్షమై ఒక కఠినమైన పరీక్ష పెట్టాడు. "వంద ఏళ్లు బ్రతికే మందబుద్ధి అయిన పుత్రుడు కావాలా? లేక పదహారేళ్లు మాత్రమే బ్రతికే మహా జ్ఞాని, నా భక్తుడు అయిన పుత్రుడు కావాలా?" అని అడిగాడు. ఆ దంపతులు ధర్మాన్ని ఎంచుకున్నారు... "జ్ఞాని అయిన కొడుకే కావాలి" అని కోరుకున్నారు. అలా జన్మించినవాడే మార్కండేయుడు. మార్కండేయుడు పుట్టినప్పటి నుంచే శివనామ స్మరణతో పెరిగాడు. వేదశాస్త్ర పారంగతుడయ్యాడు. కానీ, తల్లిదండ్రుల మనసులో మృత్యువు అనే భయం నీడలా వెంటాడుతూనే ఉంది.

     కాలం గడిచిపోయింది. మార్కండేయుడికి పదహారేళ్లు నిండాయి. ఆ రోజు రానే వచ్చింది. తన తల్లిదండ్రుల దుఃఖానికి కారణం తెలుసుకున్న ఆ బాలుడు ఏమాత్రం చలించలేదు. "అమ్మా, నాన్నా! విధిని మార్చగల శక్తి ఆ విశ్వేశ్వరుడికి ఉంది. నేను ఆయన్నే నమ్ముతాను" అని ధైర్యం చెప్పి సముద్ర తీరానికి వెళ్లాడు. అక్కడ ఇసుకతో ఒక అందమైన శివలింగాన్ని ప్రతిష్టించాడు. దానిని పంచామృతాలతో అభిషేకించి, "ఓం నమః శివాయ" అనే మంత్రాన్ని త్రికరణ శుద్ధిగా జపించడం మొదలుపెట్టాడు. ఆ చిన్నారి ప్రాణాలను తీసుకెళ్లడానికి యమదూతలు వచ్చారు. కానీ, మార్కండేయుడి చుట్టూ ఉన్న ఆ శివతేజస్సును తాకలేక, భయపడి వెనుదిరిగారు.

    చివరికి యమధర్మరాజే స్వయంగా తన మహిషంపై ఉగ్రరూపంతో వచ్చాడు. "బాలకా! నీ ఆయువు ముగిసింది. ఈ లోకాన్ని వదిలి రాక తప్పదు" అని గర్జించాడు. కానీ మార్కండేయుడు కళ్లు తెరవలేదు. శివలింగాన్ని తన రెండు చేతులతో గట్టిగా హత్తుకున్నాడు. "స్వామీ! నిన్నే నమ్ముకున్నాను, నన్ను కాపాడు" అని ఆర్తితో ప్రార్థించాడు. యముడు తన భయంకరమైన యమపాశాన్ని విసిరాడు. ఆ పాశం మార్కండేయుడి మెడకే కాకుండా, అతను కౌగిలించుకున్న శివలింగానికి కూడా చుట్టుకుంది. సాక్షాత్తు ఆ పరమేశ్వరుడినే బంధించాలని చూసిన యముడి చర్య శివుడికి ఆగ్రహం తెప్పించింది.

     అంతే! ఆ ఇసుక లింగం ఒక్కసారిగా బద్దలైంది. కోటి సూర్యుల తేజస్సుతో, ప్రళయకాల రుద్రుడిలా మహాశివుడు ఆ లింగం నుండి ఆవిర్భవించాడు. తన త్రిశూలంతో యమధర్మరాజును గుండెపై పొడిచి, కింద పడేశాడు. ఆ ఘట్టాన్నే మనం 'కాలసంహార మూర్తి' అని పిలుస్తాం. యముడు భయంతో గజగజ వణికిపోయి, శివుడి పాదాలపై పడ్డాడు. "స్వామీ! నా ధర్మాన్ని నేను నిర్వర్తించాను, నన్ను క్షమించు" అని వేడుకున్నాడు. అప్పుడు శివుడు, "యమా! నా భక్తుడిని తాకే సాహసం చేసినందుకు నిన్ను శిక్షించాను. కానీ, సృష్టి క్రమం ఆగకూడదు కాబట్టి నిన్ను బతికిస్తున్నాను. అయితే, నా భక్తుడైన మార్కండేయుడు ఇకపై 'మార్కండేయ చిరంజీవి'గా వెలుగొందుతాడు" అని వరమిచ్చాడు.

     ఆ రోజే మార్కండేయుడు "మృత్యుంజయ స్తోత్రాన్ని" పఠించి పరమశివుడిని స్తుతించాడు. ఆ బాలుడు ఇప్పటికీ నిత్య యవ్వనుడిగా, చిరంజీవిగా హిమాలయాల్లో తపస్సు చేసుకుంటున్నారని మన పురాణాలు చెబుతున్నాయి. భక్తులారా! ఈ కథ మనకు నేర్పేది ఒక్కటే... భయమున్న చోట భక్తి ఉండదు, భక్తి ఉన్న చోట మరణ భయం ఉండదు. 

    శివయ్య లీలలు ఎంత అద్భుతమో చూశారా! మరణాన్ని శాసించే యముడినే శాసించగల ఏకైక శక్తి ఆ మహాశివుడు. అందుకే ఆయన్ని 'మృత్యుంజయుడు' అంటారు. మార్కండేయుడి లాంటి నిశ్చలమైన భక్తి మనలో ఉంటే, మనకు ఎలాంటి భయాలు ఉండవు. ఈ సోమవారం నాడు మీరు కూడా ఈ కథను స్మరించుకుంటూ, ఆ పరమశివుడి అనుగ్రహం పొందాలని కోరుకుంటున్నాను. ఈ వీడియో మీకు నచ్చినట్లయితే లైక్ చేయండి, మరిన్ని ఆధ్యాత్మిక విశేషాల కోసం మన ఛానల్‌ను సబ్‌స్క్రైబ్ చేసుకోండి.

ఓం నమః శివాయ! హర హర మహాదేవ! 

 

:: 50 ఏళ్లుగా ఆరకుండా మండుతున్న నరక ద్వారం! :: 

     నమస్కారం! జీవనస్రవంతికి స్వాగతం. భూమి మీద నరకం ఎక్కడుందో ఎవరికీ తెలియదు. కానీ, తుర్క్మెనిస్తాన్‌లోని ఒక ఎడారి మధ్యలో 'నరక ద్వారం' అని పిలవబడే ఒక భారీ అగ్ని గుండం ఉంది. గత 50 ఏళ్లుగా ఈ గుండం ఆరకుండా నిరంతరం మండుతూనే ఉంది. అసలు ఈ మంటలు ఎవరు రాజేశారు? ఇది ప్రకృతి సృష్టించిన వింతనా లేక మనుషులు చేసిన తప్పా?

     1971వ సంవత్సరంలో సోవియట్ ఇంజనీర్లు సహజ వాయువు (Natural Gas) కోసం ఈ ఎడారిలో తవ్వకాలు జరిపారు. అనుకోకుండా అక్కడ ఉన్న భూమి కుంగిపోయి, 230 అడుగుల వెడల్పు గల ఒక భారీ గుంత ఏర్పడింది. ఆ గుంత నుండి ప్రాణాంతకమైన మిథేన్ గ్యాస్ బయటకు రావడం మొదలైంది. ఆ గ్యాస్ వల్ల చుట్టుపక్కల ఉన్న గ్రామాల ప్రజలకు ప్రమాదం వాటిల్లుతుందని భయపడిన శాస్త్రవేత్తలు, ఆ వాయువును కాల్చివేయాలని నిర్ణయించుకున్నారు.

    కొన్ని రోజుల్లో మంటలు ఆరిపోతాయని భావించి వారు ఆ గుంతకు నిప్పు పెట్టారు. కానీ, వారి అంచనా తప్పింది. ఆ గుంతలో ఎంత సహజ వాయువు నిక్షిప్తమై ఉందో ఎవరూ ఊహించలేకపోయారు. అప్పటి నుండి నేటి వరకు, అంటే దాదాపు అర శతాబ్ద కాలంగా ఆ మంటలు నిరంతరాయంగా మండుతూనే ఉన్నాయి. చీకటి పడితే కిలోమీటర్ల దూరం వరకు ఈ అగ్ని కీలల వెలుగు కనిపిస్తుంది. అందుకే స్థానికులు దీనిని 'నరక ద్వారం' (Darvaza Gas Crater) అని పిలుస్తారు.

     ప్రస్తుతం ఇది ఒక ప్రముఖ పర్యాటక ప్రాంతంగా మారింది. ఎంతో మంది శాస్త్రవేత్తలు దీనిని ఆర్పడానికి ప్రయత్నించినా ఫలితం లేకపోయింది. భూగర్భంలో దాగి ఉన్న ఇంధన సంపద ఎంత అపారమైనదో చెప్పడానికి ఈ 'నరక ద్వారం' ఒక నిలువెత్తు నిదర్శనం. ఇలాంటి మరెన్నో అద్భుతమైన నిజాల కోసం వింటూనే ఉండండి ఉండండి - జీవనస్రవంతి.

 

::శ్రీకృష్ణుడి ప్రతిజ్ఞ - భక్తుడి పరీక్ష :: 

    నమస్కారం! భాగవత సుధకు స్వాగతం. శ్రీకృష్ణుడు పాండవుల పక్షపాతి, అర్జునుడి ప్రాణ మిత్రుడు అని మనందరికీ తెలుసు. కానీ, సాక్షాత్తు ఆ శ్రీకృష్ణుడే అర్జునుడిని సంహరిస్తానని ప్రతిజ్ఞ చేసిన సందర్భం ఒకటుంది. భాగవతంలో దాగి ఉన్న ఆ అరుదైన కథేంటో ఈరోజు తెలుసుకుందాం.

     అసలు ఏం జరిగింది?: ఒకసారి 'గయుడు' అనే గంధర్వుడు ఆకాశంలో విమానంలో వెళ్తుండగా, క్రింద సంధ్యావందనం చేసుకుంటున్న శ్రీకృష్ణుడి చేతిలో పడేలా పొరపాటున తాంబూలాన్ని ఉమ్మివేస్తాడు. తన జపానికి విఘ్నం కలిగించిన ఆ గంధర్వుడిపై ఆగ్రహించిన కృష్ణుడు.. "సూర్యాస్తమయం లోపు గయుడి శిరస్సును ఖండిస్తాను" అని భీకర ప్రతిజ్ఞ చేస్తాడు. ప్రాణ భయంతో గయుడు ఇంద్రుడిని, బ్రహ్మను వేడుకున్నా ఎవరూ రక్షించలేకపోతారు. చివరకు నారదుడి సలహాతో అర్జునుడిని శరణు కోరుతాడు.

     విషయం తెలియని అర్జునుడు "నీకు రక్షణ ఇస్తాను" అని అభయమిస్తాడు. తీరా చూస్తే, తను రక్షించాల్సింది తన ప్రాణదైవమైన శ్రీకృష్ణుడు చంపాలనుకున్న వ్యక్తిని! ఒకవైపు మిత్రుడి ప్రతిజ్ఞ, మరోవైపు శరణు కోరిన వాడిని వదలకూడదనే క్షత్రియ ధర్మం. అర్జునుడు ధర్మానికే కట్టుబడి శ్రీకృష్ణుడిని ఎదిరించడానికి సిద్ధపడతాడు. గురువు ద్రోణాచార్యుడు, భీముడు ఆశ్చర్యపోతుండగా.. కృష్ణార్జునుల మధ్య యుద్ధం మొదలవుతుంది.

    లోకమంతా హాహాకారాలు చేస్తోంది. శివుడు ప్రత్యక్షమై వారిని వారించి.. "కృష్ణా! నీ భక్తుడు శరణాగతి ధర్మాన్ని ఎంతవరకు పాటిస్తాడో లోకానికి చూపడానికే కదా ఈ లీల!" అని నవ్వుతాడు. కృష్ణుడు మందహాసం చేస్తూ గయుడిని క్షమిస్తాడు. శరణు కోరిన వాడు శత్రువైనా సరే, ప్రాణమిచ్చి రక్షించాలి అనే గొప్ప ధర్మాన్ని చాటిన ఘట్టం ఇది.

    మరిన్ని అద్భుత భాగవత రహస్యాల కోసం వింటూనే ఉండండి - భాగవత సుధ.

 

::  ప్రేమకు ప్రతిరూపం - తాజ్ మహల్ ::  

     కాలం ప్రవాహంలో ఎన్నో కట్టడాలు పుడుతుంటాయి.. మరెన్నో కూలిపోతుంటాయి. కానీ కొన్ని మాత్రం కాలానికి ఎదురునిలిచి, తరతరాలకు ఒక అద్భుత కావ్యంలా మిగిలిపోతాయి. అటువంటి అపురూప కట్టడమే.. ఆగ్రా నగరంలోని యమునా నది తీరాన వెలసిన శ్వేతసౌధం 'తాజ్ మహల్'. ఇది కేవలం రాళ్లతో కట్టిన కట్టడం కాదు.. అమరప్రేమకు అక్షర రూపం.

     మొఘల్ చక్రవర్తి షాజహాన్, తన ప్రాణపదమైన భార్య ముంతాజ్ మహల్ జ్ఞాపకార్థం నిర్మించిన ఈ కట్టడం ప్రపంచ ఏడు వింతల్లో ఒకటిగా నిలిచింది. క్రీస్తుశకం 1631లో ప్రారంభమై, దాదాపు 22 ఏళ్ల పాటు వేలాది మంది శిల్పుల కష్టార్జితంతో ఇది రూపుదిద్దుకుంది. రాజస్థాన్ నుండి తెప్పించిన పాలరాతిపై.. పర్షియన్, ఇస్లామిక్ మరియు భారతీయ నిర్మాణ శైలుల కలయికతో ఈ అద్భుతం సాక్షాత్కరించింది.

     పౌర్ణమి వెన్నెల్లో తాజ్ మహల్ వెలిగిపోయే తీరు వర్ణనాతీతం. సూర్యోదయ వేళ గులాబీ రంగులో, సాయంత్రం వేళ బంగారు వర్ణంలో మెరిసిపోతూ చూసేవారిని మంత్రముగ్ధులను చేస్తుంది. ఈ భవనం లోపల మరియు బయట ఉన్న 'పియత్రా డ్యూరా' అనే అరుదైన రాళ్లతో చేసిన పూల అలంకరణలు, ఖురాన్ వాక్యాలు మొఘల్ కళా వైభవానికి నిదర్శనం. యమునా నది అలల తాకిడికి ఈ కట్టడం ప్రతిబింబం నీటిలో కనిపిస్తుంటే, అది ఒక అందమైన కలలా అనిపిస్తుంది.

     అందుకే రవీంద్రనాథ్ ఠాగూర్ అన్నట్టు.. తాజ్ మహల్ "కాలం చెక్కిలిపై నిలిచిన కన్నీటి చుక్క". ఏళ్లు గడిచినా, యుగాలు మారినా ప్రేమ ఉన్నంత కాలం ఈ అద్భుతం వెలుగుతూనే ఉంటుంది. సందర్శకులకు ఒక తీపి జ్ఞాపకాన్ని, చరిత్రకు ఒక గొప్ప పాఠాన్ని మిగిలిస్తూనే ఉంటుంది.

 మీరు నమ్ముతారా? మన దేశంలో ఒక విగ్రహం పరిమాణం ఏటా పెరుగుతూ వస్తోంది! అది ఎక్కడో కాదు, మన కాణిపాకం వరసిద్ధి వినాయక క్షేత్రంలోనే!"

"సుమారు వెయ్యి ఏళ్ల క్రితం ఒక బావిలో స్వయంభువుగా వెలిసిన ఈ వినాయకుడు, ఇప్పటికీ ఆ బావిలోనే కొలువై ఉన్నారు. విశేషం ఏమిటంటే, స్వామివారు రోజురోజుకూ పెరుగుతున్నారు! గతంలో స్వామివారికి చేయించిన వెండి కవచాలు ఇప్పుడు సరిపోవడం లేదని తెలిస్తే మీరు ఆశ్చర్యపోతారు. అందుకే ఈ స్వామిని అపర శక్తి స్వరూపుడిగా భక్తులు కొలుస్తారు."

"ఈ మహిమాన్విత క్షేత్రం గురించి పూర్తి విశేషాలు, అక్కడికి ఎలా వెళ్ళాలి? ఎక్కడ ఉండాలి? వంటి పూర్తి వివరాలను తెలుసుకోవాలనుకుంటున్నారా? అయితే ఆలస్యం చేయకుండా, కింద కనిపిస్తున్న లింక్ క్లిక్ చేసి మా 'యాత్రాసుధ' ఛానల్‌లోని పూర్తి వీడియోను ఇప్పుడే చూడండి!"

"మరిన్ని ఆధ్యాత్మిక, యాత్రా విశేషాల కోసం ఇప్పుడే యాత్రాసుధను సబ్‌స్క్రైబ్ చేసుకోండి!"